მას ყველა დაჟინებით აკვირდება, დასცინის, „მსოფლიოში ყველაზე საზარელ ქალს“ უწოდებს. ლიზი ველასკესი მხოლოდ 23 წლის გახლავთ, თუმცა იგი იშვიათი დაავადების გამო 26 კილოგრამს იწონის. გოგონას სხეულში კანქვეშა ცხიმოვანი საფარი საერთოდ არ გააჩნია, იგი მოსიარულე ჩონჩხს მოგვაგონებს. საბრალოს დღეში 60-ჯერ მაღალკალორიული საკვების მიღება უწევს, თუმცა, წონაში მომატებას მაინც ვერ ახერხებს.
მიუხედავად ლიზის მდგომარეობისა, ველასკესი უკვე მეორე წიგნზე მუშაობს, სადაც საკუთარ ცხოვრებას აღწერს. პირველ წიგნში, ის გოგონებს ურჩევს ისწავლონ როგორ გახდნენ უნიკალურები, მიიღონ განათლება, როგორ შეიძინონ კარგი მეგობრები. ლიზიმ აგრეთვე ტელეინტერვიუც მისცა, სადაც საკუთარ რთულ სიტუაციაზე ისაუბრა. „მეც ადამიანი ვარ, ამიტომ დაცინვა გულს ძალიან მტკენს, თუმცა, თავს უფლებას არ ვაძლევ, რომ ასეთმა რამემ სასოწარკვეთილებაში ჩამაგდოს. ხანდახან ვამჩნევ, თუ როგორ მაკვირდებიან და მიჩნდება სურვილი, რომ მათ სავიზიტო ბარათი მივცე წარწერით: „მე ლიზი ვარ, შეგიძლიათ ჩემი თვალებით ჭამა შეწყვიტოთ და უფრო მეტად გამგებნი გახდეთ?“ სხვათაშორის, მე ძალიან კმაყოფილი ვარ, რომ ცნობილ ლამაზმანებს არ ვგავარ. უკეთესიც არის, რომ მე სხვანაირად გამოვიყურები, რადგანაც ხალხი იგებს, თუ როგორი ვარ სინამდვილეში.“ - აცხადებს ლიზი.
გოგონას დედა ამბობს, რომ ექიმებს წარმოდგენა არ აქვთ, მისი შვილი აქამდე ცოცხალი როგორ არის. მედიკოსების აზრით, ის სიარულსა და ლაპარაკს ვერასდროს შეძლებდა. ორი წლის ასაკში, ლიზი 5 თვის ბავშვის ზომის გახლდათ. ბავშვობაში ლიზი ერთი თვალით დაბრმავდა, რასაც ექიმები ვერ ხსნიან. ისინი ამბობენ, რომ ეს არის იშვიათი გენეტიკური დაავადება და მათ არ იციან მომავალში, რა შეიძლება დაემართოს ველასკესს. თავად ლიზი ცდილობს იმედი არ დაკარგოს. მისი თქმით, მან ამ საშინელ დაავადებასთან ერთად ცხოვრება უკვე ისწავლა.